पालुङ जेसीजद्वारा अागलागी पिडितलाई खाद्यान्न सहयाेग ।

2020-06-01

शनिबार राती आगलागीमा परी घर, खाद्यान्न, लत्ताकपडासहित सबै सामानहरु जलेपछि पीडामा परेका थाहा नगरपालिका–१० विसिङ्खेलका तीन परिवारलाई पालुङ जेसीजले प्याकेजमा खाद्यान्न वितरण गरेको छ ।

विसिङ्खेलमा तीन तले घर जलेर नष्ट भएपछि उक्त घरमा बस्दै आएका तीन परिवारलाई पालुङ जेसीज वर्ष २०२० का अध्यक्ष मनोज रायमाझीको नेतृत्वमा गएको टोलीले सहयोग प्रदान गरेको हो ।

विसिङ्खेल नै पुगेर प्रदान गरिएको सहयोगअन्तर्गत प्रतिपरिवार २५ किलो चामल, २ प्याकेट नून, २ लिटर तेल र २ किलो दाल रहेको छ । जेसीजले विपतमा परेका मानिसहरुका लागि संचालन गरेको ‘फुड बैंक’ बाट पीडितलाई सहयोग गरेको हो ।

सहयोग कार्यक्रममा पालुङ जेसीजका अध्यक्ष रायमाझी, महासचिब नवराज लामा, कोषाध्यक्ष संगम कार्की, उपाध्यक्षहरु निरज रायमाझी, विक्रम गोपाली, सुजन कार्की, प्रकरण निर्देशक जयराम खत्री, जेसी विनोद थिङ लगायत सहभागी थिए ।

सहयोग हस्तान्तरण कार्यक्रममा पीडित परिवारले जेसीजलाई धन्यवाद दिएका थिए ।

पीडित परिवारमध्ये आगलागीमा परी २८ बर्षीया किरणदेबी गमाल, उनको ८ बर्षीय छोरा जेम्स गमाल र कान्छो छोरा ८ महिनाको आवास गमाल घाइते भएकोमा उनीहरुको काठमाण्डौंमा उपचार भइहेको छ ।

उक्त घटनामा करिव ५० लाख बराबरको क्षति भएको थियो ।


JCI News Archive