वीरता जेसीजले झापाको अर्जुनधारा–१ स्थित शंकराचार्य पीठ वेदवेदाङ्ग संस्कृत पाठशाला साधुटारमा आवासियरुपमा रहने बटुक तथा गुरुहरुका लागि एकदिनको भोजनवापतको रकम प्रदान गरेको छ ।
शंकराचार्य पीठ वेदवेदाङ्ग संस्कृत पाठशाला साधुटारको ४६औं वार्षिकोत्सवका अवसरमा गत माघ १ गतेबाट सञ्चालन भइरहेको श्रीमद् भविष्य महापुराण पाठ कथा चौरासी सिद्धशिवलिङ्ग स्थापना चलप्रतिष्ठात्मक विराट महायज्ञमा सहभागी भएर शंकराचार्य पीठ वेदवेदाङ्ग संस्कृत पाठशाला साधुटारमा आवासियरुपमा रहने बटुक तथा गुरुहरुका लागि एकदिनको भोजनवापत २५ हजार रुपैयाँ प्रदान गरिएको वीरता जेसीजका अध्यक्ष प्रविण खड्काले बताए ।
शंकराचार्य पीठ वेदवेदाङ्ग संस्कृत पाठशाला साधुटारमा आवासियरुपमा बटुक तथा गुरुहरु गरी ८५ जना रहेको र उनीहरुलाई एक दिनको भोजनवापत २५ हजार रुपैयाँ प्रदान गरिएको उनले बताए । मानवताको सेवा नै जीवनको सर्वोत्तम कार्य हो भन्ने जेसीजको आस्थालाई आत्मसात गर्दै उक्त सहयोग गरिएको उनले बताए ।
वीरता जेसीजका अध्यक्ष प्रविण खड्काले उक्त रकम शंकराचार्य पीठ वेदवेदाङ्ग संस्कृत पाठशाला साधुटारका व्यासाचार्य लक्ष्मीप्रसाद खतिवडालाई हस्तान्तरण गरेका थिए ।
