पर्वत जेसीजको पहलमा प्रदेश अस्पताल कुश्मालाई करिब रु. १६ लाख मूल्य बराबरको *CA-200 Automatic Chemistry Analyzer* मेसिन हस्तान्तरण गरिएको छ। उक्त आधुनिक उपकरणले अस्पतालमा स्वास्थ्य परीक्षण सेवालाई थप छिटो, सहज तथा गुणस्तरीय बनाउन महत्वपूर्ण सहयोग पुर्याउने विश्वास गरिएको छ।
यस महत्वपूर्ण कार्यक्रममा कुस्मा नगरपालिकाका प्रशासनिक अधिकृत किरण पौडेल प्रमुख अतिथिका रूपमा उपस्थित रहनु भएको थियो भने प्रदेश अस्पताल व्यवस्थापन समितिका अध्यक्ष यम बहादुर परियार विशिष्ट अतिथिका रूपमा सहभागी हुनु भएको थियो। कार्यक्रममा पूर्व अध्यक्ष शंकर गिरी,अध्यक्ष क्लबका अध्यक्ष जेसी सिनेटर कृष्णप्रसाद श्रेष्ठ, पूर्व अध्यक्षहरू, निमर्तमान अध्यक्ष, बोर्डका सदस्यहरू तथा जेसीजका साथीहरू र अस्पताल व्यवस्थापन समितिका सदस्यहरूको उल्लेखनीय उपस्थिति रहेको थियो।
हस्तान्तरण गरिएको *CA-200 Automatic Chemistry Analyzer* मेसिनले रगत तथा शरीरका विभिन्न नमूनाहरूको परीक्षण गरी मधुमेह (ब्लड सुगर), कलेजो सम्बन्धी समस्या, मिर्गौला कार्यक्षमता, कोलेस्ट्रोलको मात्रा, युरिक एसिड, इलेक्ट्रोलाइट सन्तुलन लगायतका महत्वपूर्ण स्वास्थ्य सूचकहरूको छिटो र सटीक विश्लेषण गर्न सक्षम छ। यस मेसिनको प्रयोगले बिरामीहरूको रोग पहिचान छिटो गर्न तथा उपचार प्रक्रिया प्रभावकारी बनाउन महत्वपूर्ण भूमिका खेल्ने अपेक्षा गरिएको छ।
पर्वत जेसीज परिवारले यति ठूलो मूल्य बराबरको स्वास्थ्य उपकरण उपलब्ध गराउन पाएकोमा गर्व व्यक्त गर्दै यसले स्थानीय बिरामीहरूलाई छिटो र भरपर्दो सेवा प्रदान गर्न सहयोग पुग्ने विश्वास व्यक्त गरेको छ।
यसै अवसरमा उक्त मेसिन ल्याउन पहल गर्ने कुस्मा नगरपालिकाका मेयर रामचन्द्र जोशी तथा सहयोगी दाताहरूप्रति हार्दिक धन्यवाद ज्ञापन गरिएको छ।
पर्वत जेसीजले यसअघि पनि सामाजिक तथा स्वास्थ्य क्षेत्रका विभिन्न कार्यक्रमहरू सञ्चालन गर्दै आएको छ र आगामी दिनहरूमा पनि यस्ता सेवामूलक कार्यलाई निरन्तरता दिने प्रतिबद्धता जनाएको छ।